مع كل صحفة كنت بقراها في المجموعة كنت بسأل نفسي إيه المانع إنها تكون واحدة من أشهر وأهم كتابات محفوظ؟ 14 قصة من أجمل ما كتب محفوظ، نادرا ما هتلاقي فيها قصة واقعة أو قصة كمالة عدد مثلا.
أول ما لفت انتباهي ليها؛ كنت بقرأ خطاب لجنة نوبل عن محفوظ وأسباب فوزه بالجايزة.. قالت اللجنة عن المجموعة إنها عمل يقوم بمعالجة فنية للأسئلة الوجودية. وده تحديدا أهم وصف واختصار اتكتب عن المجموعة.. الأسئلة الوجودية هنا مش عينة الترند بتاع "كيف بدأ الخلق" وإنما أسئلة ذاتية عن الوجود، ومعنى حياتنا. أسئلة عن الإله والشر والخير والمصائر المختلفة لأشخاص منبعهم اللي خرجوا منه للحياة واحد، عن السعادة والحزن والمبادلة بينهم في الحياة.
وأنا بقفل آخر قصة قعدت أراجع الأفكار اللي اتعرضت في المجموعة؛ اكتشفت إنه تقريبا أغلب الأسئلة اللي عندي عن الدنيا ليها حكايات موجودة في المجموعة، ويمكن ممكن اختصر قصص كتير منها بتوصّف عبثية واعتباطية الحياة وشكل سيرها.
مجموعة مهمة جدا، أكتر أهمية من كل المجموعات القصصية اللي قرأتها لنجيب السنة دي زي (همس الجنون، خمارة القط الأسود، صدى النسيان، وهمس النجوم ) ويمكن تتخطى عندي أهمية (رحلة ابن فطومة ) اللي معتبرها واحدة من درر أدب نجيب محفوظ؛ سواء بسبب الأسئلة أو التوصيف للفلسفة أو بسبب النهاية.
قيمتها على جود ريدز بـ(5/5) من غير تفكير، ومش عارف والله كل واحد قرأ المجموعة دي جاله نِفس إزاي يكتب تاني؟ غالبا قعد فترة طويلة يتعافى من جرعة الأدب العظيمة دي عشان يحس إنه ممكن يقدم جديد بكتابته.
المجموعة صغيرة، 14 قصة في 200 صفحة (طبعة الشروق ) ومناسبة جدا لأي وقت حابب تقرأ فيه. فترة الأسئلة الوجودية شغال، فترة الروقان شغال، امتحانات شغال، مواصلات شغال، مناسبة جدا جدا.. بس بتركيز عشان تتبسط وإنت بتقرأ.
كنت أتمنى إنها تكون ختام قراءات السنة بس واضح إن لسه فاضل فيا نَفَس اخلص الحاجات المتعلقة؛ عشان مبحبش اسيب للسنة ديل في القراءة.
-
نجيب محفوظ، دنيا الله.
ديسمبر، 2019.
5/5.
تعليقات
إرسال تعليق